ИНГОЖ

Берыктон луд

Удмурт Достоевский

Йӧскалык библиотекалэн «ВКонтакте» бамысьтыз

Ф. Достоевскийлэсь веросъёссэ берыктизы Удмурт кун университетысь преподаватель Надежда Тимерханова (куинетйез) но студентъёс.

Зуч классиклэн Ф. Достоевскийлэн 200 ар тырмонэзлы сизем ужрадъёс азьланьтисько на.

Йӧскалык библиотекаын алигес ортчиз писательлэн удмурт кылэ берыктэм веросъёсыныз тодматскон ужрад. Табере библиотекаын вань Ф. Достоевскийлэн «Рассказы. Веросъёс» изданиез. Татчы пыризы «Мальчик у Христа на ёлке» но «Мужик Марей» веросъёсыз. Национальной библиотекаын ужасьёс вазиськизы Удмурт кун университетысь Удмурт филологияя, финно-угроведениея но журналистика институтысь лингвистической типологияя но лингводидактикая кафедрае, зуч классиклэсь веросъёссэ удмурт кылэ берыктыны курыса.

Та кафедраен кивалтись Надежда Тимерханова верамъя, библиотекаын ужасьёс писательлэсь 5 вероссэ берыктыны чектизы вал.

— Мон бырйи кыксэ. «Мужик Марей» веросэз берыкти ачим, «Мальчик у Христа на ёлке» произведенизэ — кылысь кылэ берыктонъя «Кылбугор» студие ветлись студентъёсын чош, Владимир Елышевен, Татьяна Ильинаен но Мария Ситниковаен. «Мужик Марей» верос монэ паймытиз. Зуч классик туж оскымон возьматыны быгатэм, кыче яратись луыны быгатэ пиосмурт. Малпасько, верос удмурт шӧмо луиз, но отын Ф. Достоевскийлэн гожъяськон амалъёсыз, стилез утиськизы, — вераз Надежда Николаевна.

Пусйыны кулэ, Ф. Достоевскийлэн удмурт кылэ берыктэм веросъёссэ лыдзыны быгатозы ляб адзись но синтэм адямиос. Малы ке шуоно та издание, бадзым букваосын сяна, Брайльлэн шрифтэныз но поттэмын.

Галина СЕМЁНОВА