1 ПЁТР, 2

²² Үннә үгд орад, ахнр-дүүнрин йосн дуриг үзүлхәр тадн седклән цеврүлвт. Иим учрар тадн әрүн седкләрн оньдиндән нег-негндән дурта болтн. ²³ Тадн үрдг экнәс биш, мөңк бәәдг Бурхна үгәс төрсн биләт. ²⁴ Яһад гихлә, «орчлңгин әмтә-киитә юмн ноһан мет, теднә туурмж теегин цецгә мет. Ноһан хумхарна, цецгәс хагсад унж одна, ²⁵ Зуг Деед Эзнә үг мөңк болна». Эн үг тадн дунд тархагдсн мөн.

2 Тадн ямаран чигн худл келдг, хар саната, хойр чирәтә бәәдлэн, үлү үзлһнә, худл герчллһнә заңган хайтн. ² Нилх үрн үс уухар седдг метәр, тадн Бурхна үгәс уухар седтн. Тегәд тадн өсәд аврлтд күрхит. ³ Яһад гихлә, тадн Деед Эзн цаһан саната болдгинь бийстн медж аввт.

Эмд чолун болн әрүн улс

⁴ Деед Эзн тал өөрдтн. Тер әмгнә һолсн әмд чолун болвчн, Терүг Бурхн шүүж авла. Тер Бурхна хәләцәр үнтә болҗана.

⁵ Бурхн тадниг әмд чолун кевтә олзлад, Эврәннь сүмиг тосхҗана. Тегәд тадн әрүн гелңгүд болад, Әрүн Сәкүснәс һарчах бәрц бәрхит. Эн тәкл Исус Христосар дамжад Бурхнд тааста. ⁶ Бурхна Бичгт иигж бичәтә: «Хәләтн! Ода Би Сион деер шүүж авсн сүүрин эрдни һол чолу тәвҗәнәв. Терүнд иткдг күн төрүц һутагдшго». ⁷ Тегәд таднд, иткдг улст, эн чолун ик үнтә болҗана. Зуг эс иткдг улст: «Эн чолун тосхачнрин һолсн чолун, герин сүүрин һол чолун болж», – гиж Бурхна Бичгт бичәтә. Бас иигж бичәтә: «Эн чолунд әмтн бүдрәд унна. Эн харш чолун». ⁸ Тедн Бурхна үг эс соңссндан бүдрнә. Тиим заята улс тедн.

⁹ Тадн болхла, Бурхна келн-әмтн, шүүж авгдсн әрүн болн Бурхна алдр йовдлмуд зәңглх улс болн Хаана гелңгүд мөн. Бурхн тадниг харңһуһас Эврәннь һәәхмҗтә герлүр дуудсн билә. ¹⁰ Урднь тадн келн-әмтн биш биләт, ода Бурхна келн-әмтн болвт. Урднь Бурхн тадниг хәәрлсн уга билә, ода болхла хәәрлнә.

Бурхна зарцнр

¹¹ Хәәртә үүрмүд! Би тадниг зуульч болн хәр улс метәр эрҗәнәв: Тана ухан-седклтә дәәлддг килнцтә тачалмудас хол йовтн.

¹² Буру номта улс дунд чикәр бәәтн. Тегәд тадниг хар сана

311