Benchmarks

— Би хуннюн яв аю долдадай укчэндим, ху би гуд, эгден, нодадь-мар-да бисиву эсэс көемсэ! Ху ихэргили биддил, як аю хадис! — хокаччиникан, Мунэде нагиргиттан.

— Гэл, хи онул бидли! — Хуланя гөнни.

— Мявчан, хи миндук хо бидэй хикутич бисон бисэнри?! — Мунэде нян Мяв бисорив осэйрэн.

— Мунэде, мут эрэклэ истала эрэк төр бисивэн чөптэрэ хо аич, аникэн тыкуматта нимэклэттыт, тек хи он онри? Мут хин-нюн яв-да эсэп касэгчир, гуд, эгден-дэ били, — Мявчан энтукун төрэн.

— Хи минтэки эди нюнэткил, би он биннэв! Би хиндук-тэ мэргэчидмэр бисэм! — Мунэде нагыргиттан.

— Би хинду эсэм нюнэттэ, эгден, мэргэч ходьмар ай, дулам бинмэин. Энмэй дюлейнюн хокатта-да хопчар! — Мявчан гөнни.

— Тэкэн, эди дудңэр! — Мунэде тикулран.

— Мунэде, хи ями тачимур хиранри? Ями хин хэес хэбгынни? Эди хиркил! Хиррий, хокачи ходукун диллас тилкундик! Мунэде, мэни турусчисчили, и, — Мявчан эйлинрэн.

Мунэдэ яв-да эсни барагра, тачин-та хиралран. Ноңан хэен тачикан-та хэбгэнни, дялби тикуми, хикутич өгэски көетникэн бидилрэн. Эгден одни, исунни-ккэ эсни.

Хоя инэң, бяг, аңал, елтэн, Мунэде, дялтакий хирми, эгдесэт-ми-дэ, эсни ок-та ичисотэ-дэ, хо хирран.

Долба бисин. Мявчан, Хуланя-да, хөнтэл-дэ урэкчэр долба якутта агды урэчинни игдук, пасылындук, курэлэндук мялра, хо олра. Мявчан мяванни асукут хэгдэррэн. Ноңартан хо мян, хэңүлрэ.

Бадикар нимэкэл тэгрэ, көеттэ — Мунэде ачча, дулакандулий муктаррин, хэен-дэ, никанни-да эйду тилкуча. Ноңан хокачи ходукун нирилий муктаррин. Тек Мунэде ач хурэлэ, ойлан төңэртэкэн.

— Куңал, ху-дэ эдилрэ яв-да аю оми хокачкарар-а, Мунэде урэчин одикалсан! — тачин гөникэн, амму нимкам оддан.

Мунэде, тек гөми, вулкан бидин; тарак тикулриди, хиврин, ноңан хэелэн төнэр тэкэрлэ бисни. Тарав төнэрү абаңадят — этэвун нөн көерин.

Тэк-ккэл тарак ачча. Усил бэил дёданмий-тан текэрэклэ тала дэсчин.