Benchmarks

ΝΟΜΑΡΧΗΣ Γιατί ἐρωτᾷς;

ΘΥΜΙΑ Ἂν 'κι εἶσαι παντρεμένος, ἔλα ἂς δίγουμε σε τὴν πατσὴ μ' τὴν Πελα(γ)ίαν. Ἐν' πολλὰ ἔμορφον κορίτσ', ἄμα κανὰν 'κ' ἐρέχκεται σο χωρίον ἐμουν. Ἐπῆεν καὶ σο Γυμνάσιον καὶ ἐξέρ' καὶ Γαλλικά.

ΝΟΜΑΡΧΗΣ Σουμαδεμένος εἶμαι. Ἐν' δύο μῆνας ἀσσὸ ἐσουμαδεύτα μετ' ἕναν κορίτσ', ἐκεῖνο πα Πελα(γ)ία ἀκούει.

ΘΥΜΙΑ Κι ἀφήντς ἐκείνεν τὴν Πελα(γ)ίαν καὶ παιρτς τ' ἐμέτερον τὴν Πελα(γ)ίαν ἀτώρα ποὺ ἐγνωριμάγαμε;

ΝΟΜΑΡΧΗΣ Ἀτὸ μαναχὸν 'κ' ἐπορῶ νὰ εὐτᾶ(γ)ω, 'κι σ'κων' ἀτο τὸ ναμούσι μ'. Αΐκον δούλειαν ἂν εὐτᾶ(γ)ω, ἄλλο σον κόσμον 'κι πρέπ' νὰ φανερούμαι.

ΘΥΜΙΑ (Στραβομουτσουνιάζει καὶ φεύγει ἐπιδεικτικά. Πάει πάλι δίπλα στὸ Θόδωρο).

ΘΟΔΩΡΟΣ Ντ' ἐστύπωναν τὰ κατσία σ'; Τὰ στύπα ὁ Νομάρχης ἔφαεν.

ΝΟΜΑΡΧΗΣ Ὁ κατακέφαλον σουμαδεμένος ἐν'.

ΘΟΔΩΡΟΣ Ὄχι, θὰ ἐκάθουσον κ' ἐρίαζεν τ' ἐσὸν τὴν τρανομυτίαν τὴν Πελαγίαν, ποὺ κανὰν 'κ' ἐρέχκεται.

ΘΥΜΙΑ Ντο ἐποίκε σε τὸ κορίτσ' καὶ πάντα κατατρέεις ἀτο; Μίαν ἕναν καλὸν λόγον 'κι εἶπες γιὰ τὴν πατσή μ'.

ΘΟΔΩΡΟΣ Ἀτόσα παιδία σο χωρίον ἐμουν καὶ κανὰν 'κ' ἐρέχκεται ἡ ψηλομυτία.

ΘΥΜΙΑ Κι ἀ 'κ' ἐρέχκεται ντο νὰ εὐτᾶμε;

ΘΟΔΩΡΟΣ Κόσμα, πότε θὰ τραγωδεῖς;

Γ.ΚΟΣΜΑΣ Ἕτοιμος εἶμαι (Τραγουδάει)

Νομάρχη, καλωσόρισες σ' ἀβούτο τὸ χωρίον,
ἐσὺ νὰ βοηθᾶς μας ἐσέ, νὰ 'φτᾶμ' ἀτο καλλίων.

ΝΟΜΑΡΧΗΣ Ἐσεῖς νὰ ἤστουνε καλὰ καὶ ὅλα θὰ γίνταν.

Γ.ΚΟΣΜΑΣ Σὴ βάλταν δέκα στρέμματα χωράφα θέλ' ὁ Κώστης

ΝΟΜΑΡΧΗΣ Δεκαπέντε θὰ δίγ' ἀτον.

Γ.ΚΟΣΜΑΣ Τὸν Τότον Χαβιτσόπουλον νὰ δίς πέντε χιλιάδες

ΝΟΜΑΡΧΗΣ Ὀχτὼ χιλιάδες θὰ δίγ' ἀτον.

Γ.ΚΟΣΜΑΣ Τὸ χτῆνον τὸ μαλτέζικον θὰ δίς ἀτο σ' ἐμένα.

ΝΟΜΑΡΧΗΣ Μετ' ἕναν θελ'κὸν μουσκάρ'.

Γ.ΚΟΣΜΑΣ Γαϊδίρ' Κυπραίικον θὰ δίς τὸν Στάθον Πιλιτσίδην.