Benchmarks

434

2 Коринфтегілерге 5, 6

кізілер постарына нимес, че оларның ӱчӱн ӧліп, тірілген Христосха чуртирға киректер.

¹⁶ Піске кізілерні, кӧрчеткен нимее тӧстеніп, чарғылирға чарабас. Хачан-да Христостаңар, кізідеңер ле чіли, сағынған полғабыс. Ам, тізең, пасха сағынарға кирекпіс. ¹⁷ Ам, тізең, Христоснаң пір полыбысхан кізі наа кізі пол парған. Иргі чуртас ирт парған, прай ниме наа пол парған. ¹⁸ Прай ол нимені Худай иткен. Ол Иисус Христостың пастыра пісті Позынаң чарастыр салған паза піске пасхаларын чарастырарға пӧгін пирген. ¹⁹ Худай кізілерні чазыхтары ^с ӱчӱн пыролабаан. Ол Христостың пастыра тилекейні Позынаң чарастырыбысхан паза піске ол чарастаңар сӧсті тарадарға пир салған.

²⁰ Ол ондайнаң піс Христостың адынаң чоохтапчабыс. Пістің пастыра Худай Позы чоохтанчатханға килісче. Аннаңар Христостың адынаң алданчабыс сірерге: Худайнаң чарас салыңар. ²¹ Чазығы чох Христосты Худай пістің чазыхтарыбыс ӱчӱн хатығлап салған. Аннаңар піс, Христосха киртінчетсебіс, Худайның алнында арығ кӧңніліг полчабыс.

⁶ Піс, тізең, Худайнаң хада тоғынчатханнар, Ол пирген паарсасты сірерні тик ле алған полбазыннар тіп, сірерге алданчабыс. ² Чоохталған нооза: «паарсах поларға тус чит килгенде, Мин сині истіп салғам. Сині арачылир кӱн чит килгенде, Мин сағаа полыс пиргем». Мына Худайның паарсазын алҷаң тус, мына арачыланыс кӱні.

³ Тоғызыбысқа чарадынмаан кізі чох ползын тіп сағынчабыс. Аннаңар пістенер пірдеезі хомай тібезін тіп чуртирға кӱстенчебіс. ⁴ Прай нимеде тудынчатханыбыс хоостыра Худай нымысчылары полчатханыбысты кӧзітчебіс. Хыйаланыстарда, хызылыста, сидік ондайларда піс илбек тыстаныс кӧзітчебіс. ⁵ Пісті сохханнар, пиктегде тутханнар, ӧмелееннер. Піс ӱзе тоғынғабыс, уйғу-чадын пілбин, чиис чох чуртаабыс. ⁶ Че піс хачан даа арығ чӱректіг полғабыс, хыйға тудынғабыс, тыстанғабыс паза аллығ кӧңніліг полғабыс. Піс хачан даа прай нимее сыннаң хынып, Худай Худы хоостыра иткебіс. ⁷ Піс сынның сӧзіне ӱгредіп паза Худай кӱзінең тузаланып чуртаабыс. Киртіністі арачылир паза тарадар киректе арығ чӱреебіс піске хуйах паза хылыс полған. ⁸ Піреелері пісті улуғлааннар, пасхалары нимее салбааннар. Пісті хыйыхтапчалар паза махтапчалар. Пісті чой тіп санапчалар,