Алты таңманы суурғаны

⁶ Анан Хурағанның читі таңманың пастағызын суурыбысханын кӧр салғам. Соонаң тӧрт аңның пірсінің, кӱгӱрт чіли кӱзӱреп, чоохтанғанын ис салғам:

— Кил паза кӧр!

² Мин ах атты кӧр салғам! Атха мӱнген кізі ух-чаалығ паза чиңісчее пирілчеткен веноктығ полған. Ол, чиңісчі чіли, чиңіс тударға сыххан.

³ Хураған ікінці таңмазын суурыбысханда, ікінчі аңның чоохтанғанын ис салғам:

— Кил паза кӧр!

⁴ Анан чигрен ат сых килген. Атха мӱн салған кізее, удур-тӧдір ӧдіріссіннер тіп, амыр хоныхты чир ӱстӱнең чох идібізерге ӱлгӱ пирілген. Ідӧк ағаа улуғ хылыс пирілген.

⁵ Хураған ӱзінці таңмазын суурыбысханда, ӱзінці аңның чоохтанғанын ис салғам:

— Кил паза кӧр!

Мин хара атты кӧр салғам. Атха мӱнген кізі холында весы тудын салтыр. ⁶ Анан тӧрт аңның аразынаң истілчеткен ӱнні ис салғам:

— Пір ле хиникс* пуғдай алай ба ӱс ле хиникс ас пір динарийге, пір кӱннің чал ахчазына. Олива хайахтың паза хызыл арағаның паазын алыстырба!

⁷ Хураған тӧртінчі таңмазын суурыбысханда, тӧртінчі аңның чоохтанғанын ис салғам:

— Кил паза кӧр!

⁸ Мин пора тӱктіг атты кӧр салғам. Атха мӱнген кізінің ады «Ӧлім» полған. Аның соонча «Чир тӱбі» тіп аттығ ниме парған. Чир ӱстӱнің тӧртінчі чардығында — кізілерні хылыснаң, ӧзӧгіснен, ағырығларнаң паза ачын аңнарнаң чох идерге — ӱлгӱ пирілген ағаа.

⁹ Хураған пизінчі таңмазын суурыбысханда, тайығ салҷаң орынның алтында Худай сӧзін киречілееннері ӱчӱн ӧдірткен кізілернің хуттарын кӧр салғам. ¹⁰ Олар тың хысхырысханнар:

— Ах-арығ, сын Хан Худай! Ноға амға теере пістің ӧлімібіс ӱчӱн, чир ӱстӱнде чуртапчатхан кізілердең ӧс алып, оларны чарғылабинчазың?

* 6:6 Хиникс — гректерде пір килограммға килісче.