Час і месца сустрэчы змяніць нельга

(пасляслоўе пасля павышэння кваліфікацыі ў форме летняй моўнай школы)

Г.С. Хадасевіч, метадыст вышэйшай кваліфікацыйнай
катэгорыі ўпраўлення вучэбна-метадычнай работы

Яшчэ вабіць сваёй прыгажосцю лета, яно падоўжваецца, каб усе звыкліся з думкай, што верасень – самы цудоўны месяц года. Пасля летняга адпачынку кожнаму, або амаль што кожнаму вучню хочацца сустрэцца са сваімі аднакласнікамі, абмеркаваць, што новенькага здзейснілася ў іх жыцці, дзе правялі свой адпачынак, ці ўдалося “налавіць пакемонаў” з дапамогай мабільнага тэлефона.

Не спыняйце ход! Новая фішка ў вучня дае магчымасць настаўніку не застываць на месцы, а зноў нешта прыдумваць, каб матываваць вучняў да працы на ўроку. А каб быць “у трэндзе”, настаўніку патрэбна хоць на адзін крок прасунуцца наперад. І дапаможа ў гэтым павышэнне кваліфікацыі настаўнікаў англійскай мовы “Праектаванне педагагічнай дзейнасці настаўніка замежнай мовы з высокаматываванымі вучнямі”, якое адбылося напрыканцы жніўня ў дзяржаўнай установе адукацыі “Акадэмія паслядыпломнай адукацыі”.

З настаўнікамі працавала Зубрыліна Інэса Уладзіміраўна, вядомы ў рэспубліцы педагог, настаўніца англійскай мовы кваліфікацыйнай катэгорыі “настаўнік-метадыст” дзяржаўнай установы адукацыі “Гімназія № 24 г. Мінска”. Настаўнікам прапанавалася праектаваць асабістую дзейнасць у чатырох накірунках: “настаўнік – вучань”, “настаўнік – настаўнік”, “настаўнік – соцыум”, “самаадукацыя настаўніка”. Усе чатыры вектары закальцаваныя на адну і тую ж тэму – удасканаленне вучэбнай дзейнасці высокаматываваных вучняў. А таму ў адукацыйным працэсе па замежнай мове патрабуюцца сучасныя інфармацыйна-камунікацыйныя тэхналогіі. На вучэбных занятках па англійскай мове прадугледжваецца выкарыстанне вучнямі мабільных тэлефонаў, з дапамогай якіх можна даволі цікава вучыцца.

Настаўнікі з вялікім задавальненнем вучыліся праектаваць вучэбныя заняткі па англійскай мове, спрабуючы ствараць самастойна дыдактычныя напрацоўкі адносна ўсіх чатырох вектараў. У час заліку ўдзельнікі павышэння кваліфікацыі абаранялі ўзоры створанага кожным на практычных занятках педагагічнага матэрыялу. Калі вы адкрыеце спасылкі, то знойдзеце цікавыя матэрыялы для работы настаўніка:

http://zamezhniki1.blogspot.com.by/p/blog-page.html

А каб не спыняць ход асабістага развіцця і развіцця сваіх вучняў, удзельнікі летняй моўнай школы вырашылі сустрэцца тым жа саставам у жніўні наступнага года і падоўжыць не толькі ўдасканальвацца, але і абмяняцца набытым педагагічным вопытам.