Benchmarks

নোমহৌ চৎলিবা খোঙথাংদা মশা পুম্বা ইমুন মুল্লকই, অসুম অসুম উইথরকই।

“ঐঞ্জানা লাংবীবদুদা ননাইনা পুজরকলিবা পোৎলম চৈরমশিং খরা অসিবু য়াওহনবীয়ু। চহী অমগী মনুংদা অমুক্তং কৃপা পীনবীবা অসিগুম্বা তাংলবা পৰ্ব্বদিন অসি খরা চঙখোন্না, নিয়ম চুম্না কৎনবা হোৎনদবা যাদে। উমাপতিগী দর্শন ফংলক্তবা, অসিগুম্বা সেবা ফংজরক্তবা মতম কুইরকলবনি। যঞ্জ হৌবসি নুমিৎ ময়ুম হেক চঙখিবগা হৌগদৌবনি হায়না গুরুজনশিংনা তাকপী। অচাবা পুংফম শোয়হনবীগনু। যঞ্জগী মতাং মরীরকনি হায়, কৎকদৌবা পোৎচংসু তোঙান তোঙাল্লি, ঐঞ্জানা হেন্না খঙবীরম্নগনি।”

কাশীদাস য়েংখৎলকই যাত্রী অদুদা; হায়রকই,

“ঐ অশেংবদা হায়জবনি ঐনা খঙজরিবসি অদুপ কুপকনি থাজদে। ভক্তনা খঙবীবা পুম্নমকতু অমুক্তং শুগাইনা তাকপীরবদি নুংঙাইজগনি।”

“ননাই ঐসু অদুক হাকনা খঙজবা নত্তে অদুবু তাকপীরকপা খরা হঙ্গৎকে, অশোেয় অঙাম তাকপীগনি। যঞ্জগী মতাং মরীরকনি। মরীরক অসিদা অহানবা শঙ্গোম অনৌবা, মথংদা শঙ্গোম অফম্বা, অহুম শুরকপদা ঘী অদুগা মরীরকশুবা অরোইবা অদুদনা খোইহী, হায়রিবশিং অসিনা সনা হকচাং থৌগল তৌগনি, চাইথগনি। ঈশিং অশেংবনসু অমুক অমুক চাইথগনি। পুংফমসু তোঙান তোঙানগনি। কৎকদৌবা মরুওইবা পোৎচংনা, চেং থোইদিং, ঘী, খোইহী, চিনি অঙৌবা, যব, য়ুবী অকংবা, কিসমিস, কপূর অসিনি। সিগী মথক্তা ফজবা মপুং ফারবা হৈ-লৈ, তিংথৌ মতোন, পূজাগী হৌনবী পোৎলমশিং, তঙাইফদনা হৈ-খাগোক ফংদ্রগা মনা, ফংদ ফংদ্রগা হৈব্রু মনা যাওগনি। ননাই ঐনসু খরা পুজরকই। হান্নসু লাংবীরম্লগনি। অদুগা ঐঞ্জা জবা কুসুম অঙৌবা, কেতকী লৈ অদুগা শঙ্খ করতান কৎপা য়াদবনিনা কনাগুম্বা ননাইশিংনা খঙদবদগী কৎলবা য়াওরবসু থিংবীবা তাই। মসি অরুবনি।”