“МОРКО ПАМАШ”КЛУБЫШТО

2021 ий Российыште Науко да технологий идалык семын увертаралтын. Тидын кышкарыште “Морко памаш” клубын кокымшо заседанийыштыже Морко районышто шочын-кушшо шанчызе, лӱмлӧ ен-влак нерген мутланышна.

Морко кундем шагал огыл лӱмлӧ еным ончен-куштен. Пӱтынь Совет Ушемыште радио дене виянмаште изи огыл надырым пыштыше Ф.Счатливцев нерген республикыште шагал енже пала. Шымлызе, мер пашаен, экономике науко кандидат, юрист, тале историк-просветитель, химий науко дене кылдалтше марий еным парня дене шотлаш лиеш. Филологий науко доктор, 100 утла научный пашам, монографийым возышо, марий йылме орфографий ден пунктуаций правил проектын авторжо Г.Лаврентьев нергенат ойлыде ок лий. Марий кундемыште шорыкым ашныме да урлыкым саемдыме йодышым шымлыше, паша опыт дене ятыр книгам савыктыше, Москвасе ветеринарий академийыште икымше марий туныктышо С.Ласточкинымат шарналтышна. Нунын нерген материалым Морко рӱдӧ книгагудын краеведений секторыштыжо муаш лиеш.

Маргарита СЕМЁНОВА,
рӱдӧ книгагудын вуйлатышыже